Б.Энх-Оргилын Бангкок хотноо хийх тулаан хүлээлт ихтэй байна

Холимог тулаанч Б.Энх-Оргил Netflix-ийн Physical Asia шоунд эх орноо төлөөлөн оролцож, багийнхаа ялалт бүрт онцгой үүрэг гүйцэтгэсэн үзүүлэлтээр зөвхөн Монголчуудын ч биш тус шоуны үзэгчдийн анхаарлыг татаад байгаа юм.  Ховд аймгийн Жаргалант суманд төрсөн, 36 настай тулаанч маань 20 гаруй жил холимог тулаанаар хичээллэхдээ бяр, ухаан, тэсвэр хатуужил гээд бүх чадварыг өөртөө цогцлоож чадсан болохоо тус шоуны үеэр өөрөөрөө батлан харууллаа. 

Үүнээс үүдэлтэйгээр тулаанч Б.Энх-Оргилийн инстаграм хаягийн дагагч шоунд орсноос хойш огцом нэмэгдэж, 120 мянгад хүрчээ. Түүнээс гадна ирэх сард болох түүний тулааныг хүлээж буй хүн олон байна. Тодруулбал тэрбээр, ээлжит тулаанаа ирэх арванхоёдугаар сарын 5-ны баасан гарагт Тайландын Бангкок хотноо хийх товтой байгаа юм. Бразилын Фабрико Андрадетэй хийх түүний тулаан хүлээлт ихтэй байна. .