Баянгол дүүрэг хог хаягдлын менежментийг сайжруулах төслийн хүрээнд “ПРЕМИУМ НЕКСУС” ХК-тай хамтран ажиллана
Баянгол дүүргийн ЗДТГ, “Премиум нексус ХК хамтран дүүргийн хог хаягдлын менежментийг сайжруулах, хог хаягдал ангилан ялгах төслийн хүрээнд дүүргийн менежер Ж.Баатар, тус компанийн борлуулалтын үйлчилгээний газрын захирал Ц.Номинзол нар өнөөдөр хамтран ажиллах санамж бичигт гарын үсэг зурлаа. 
Баянгол дүүрэгт “Премиум нексус ХК-ийн “CU Конвиниенс” дэлгүүрийн 71 салбар, түгээлтийн 72 байршил байдаг. Иймд дүүргийн хог хаягдлын менежментийг сайжруулах ажлын хүрээнд дүүргийн ЗДТГ, “Премиум нексус “ХК нь “Урбан Солид вейст менежмент” ХХК-тай хамтран “CU Конвиниенс”дэлгүүрээс гарч буй хог хаягдлыг ангилан ялгах төслийг өнгөрсөн хоёрдугаар сарын 1-нээс туршилтын журмаар эхлүүлсэн юм.
Хамтран ажиллах Санамж бичиг байгуулах үеэр энэ төслийн үр дүнгийн талаар “Урбан солид вейст менежмент” ХХК гүйцэтгэх захирал С.Аригуун мэдээлэл өгсөн. Тэрбээр “Манай компани судалгаа хийхэд “СU Конвиниенс” дэлгүүрээс жилд 1625.7 тонн хог хаягдал гардаг бөгөөд нийт хог хаягдлын 56 хувийг дахин боловсруулах боломжтой. Мөн түгээлтийн төвөөр жилд 754.1 тонн хог хаягдал гардаг ба үүний 88 орчим хувийг дахин боловсруулах боломжтой юм. Иймд манай компани дүүргийн ЗДТГ, “Премиум нексус ХК-тай хамтран өнгөрсөн хоёрдугаар сарын 01-ний өдрөөс туршилтын журмаар хог ачилт болон түгээлтийн үйл ажиллагааг явуулж эхэлсэн.
Ингэхдээ хог хаягдлыг тэмдэглэсэн маршрутын дагуу 21:00-04:00 цагийн хооронд тээвэрлэж, цуглуулж ажиллаж байна. Энэ төслийг хэрэгжүүлсэн эхний хоёр сарын хугацаанд манай компани нийт 60 гаруй тонн хог хаягдал тээвэрлэснээс 30 хувь буюу 18 тонн нь дахин боловсруулалтад орж үр дүнтэй болсон” гэсэн мэдээллийг өгсөн юм.
Энэхүү санамж бичгийг байгуулснаар Баянгол дүүрэг цаашид хувийн хэвшлүүдтэй хамтран дүүргийн хэмжээнд хог хаягдлын менежментийг илүү сайжруулах, үр дүнтэй болгох мөн дахин боловсруулах хувь хэмжээг нэмэгдүүлэх ажлыг шат дараатай хэрэгжүүлэх чухал ач холбогдолтой юм.
