ДҮҮРГИЙН ХЭМЖЭЭНД НИЙТИЙН ЭЗЭМШЛИЙН ЗАМ ТАЛБАЙГ ЗӨВШӨӨРӨЛГҮЙ АШИГЛАЖ БАЙГАА ЗӨРЧЛИЙГ АРИЛГУУЛЖ БАЙНА

Нийслэлийн өнгө үзэмжийг сайжруулах, иргэдийн эрүүл, ая тухтай орчинд амьдрах эрхийг хангах, газар ашиглалтыг сайжруулах, явган хүний зам, талбайн хүрэлцээ хангамжийг нэмэгдүүлэх зорилгоор Нийслэлийн Засаг даргын А/237 дугаар захирамж гарсан. Энэ захирамжийн хүрээнд нийслэлийн холбогдох 10 гаруй мэргэжлийн байгууллага хамтран дүүрэг тус бүрийг гурван хэсэгт хуваан хяналт шалгалтын ажлыг зохион байгуулж байгаа бөгөөд Баянгол дүүргийн хэмжээнд нийт 33 гудамж, зам талбайн 12 чиглэлээр хяналт шалгалт хийж байгаа юм.
Тэгвэл тус ажлын хэсэг энэ сарын 17-нд Энхтайваны өргөн чөлөө Москвагийн гудамж, Товчооны зам дагуу хяналт шалгалт хийлээ. Энэ үеэр нийт 60 зөрчил илэрсэн ба нийслэлийн Хяналт шалгалтын газраас зөрчлийн арилгуулахаар холбогдох ААНБ, иргэнд шаардах хуудас өгөөд байна.  
Мөн өчигдрөөс эхлэх Ард Аюуш, Энэбишийн өргөн чөлөө, Хасбаатарын гудамж, Амарсанаагийн гудамж дагуу хяналт шалгалтыг эхлүүлсэн бөгөөд зөрчлийг Qfield апплекейшн ашиглан бүртгэлжүүлж ажиллаж байна.  
Ташрамд мэдээлэхэд, дээрх хяналт шалгалт дүүргийн хэмжээнд гурван үе шаттай зохион байгуулах бөгөөд 34 хорооноос авсан 12 чиглэлийн судалгааг Qfield апплекейшн-д оруулж холбогдох байгууллагуудад зөрчлийн мэдээллийг хүргүүлэн тавдугаар сарын 09-ний өдөр хүртэлх хугацаанд  илэрсэн зөрчлүүдийг арилгуулж ажиллах юм.