​Үндсэн хуулийн 34 жилийн ойн онцлог нь ​"БРАЙЛЬ" үсэгт ҮНДСЭН ХУУЛЬ байлаа

Ардчилсан Үндсэн хуулийн 34 жилийн ой өнөөдөр тохиож байна. Энэ жилийн хувьд УИХ шинэ даргатай болсон, УИХ-ын Тамгын газраас хараа, сонсголын бэрхшээлтэй иргэддээ зориулж Монгол Улсын Үндсэн хуулийг брайль үсгээр хэвлэн хүргэсэн нь онцлох үйл явдал байдаа. Брайль үсгээр хэвлэгдсэн Үндсэн хуулийн номын дээжийг УИХ-ын дарга Н.Учрал болон УИХ-ын хөгжлийн бэрхшээлтэй гишүүдийн төлөөлөл  Монголын хараагүйчүүдийн үндэсний холбоо, Монголын номын сангийн консерцумын төлөөлөлд хүлээлгэн өглөө.

Брайль Үндсэн хуулийг 11500 гаруй харааны, 10000 гаруй сонсголын бэрхшээлтэй иргэн харьяа дүүрэг, хууль тогтоомж сурталчлах төв, номын сан, салбар холбоондоо хандаж Үндсэн хуулиа унших, судлах боломжтой болж байгаа юм. 

Үндсэн хууль хүртээмжтэй байх нь бусад хууль тогтоомжид зөв жишиг болно гэж Улсын Их Хурлын гишүүн О.Саранчулуун үзэж байгаа бол, Монголын бүх ард түмэн Үндсэн хуулиа унших боломжтой боллоо хэмээн Улсын Их Хурлын гишүүн Ж.Баясгалан өөрийн байр сууриа илэрхийллээ. 

Харин УИХ-ын дарга Н.Учрал: "Үндсэн хууль бол зөвхөн засаг төрийн баримт бичиг биш. Үндсэн хууль бол Монголын өрх бүл, Монголын үр хүүхэд, Монгол Улсын иргэн бүрийн амьдралын баталгаа юм" гэж хэллээ.