Нийслэл энэ онд 600 тэрбумаас 1,2 их наяд төгрөгийн алдагдалтай ажиллах дүр зурагтай байна уу? 

НИТХ 2026 оны төсөвтөө тодотгол хийхээр хуралдаж эхэллээ. Нийслэл төсвийн орлогоо хоёр сарын өмнө 4.9 их наяд төгрөг байхаар тооцсон байсан. Харин энэ удаагийн тодотголоор 5.4 их наяд болгон, 438 тэрбум төгрөгөөр нэмэгдүүлэхээр тооцжээ. Орлогоо нэмэгдүүлэх болсон шалтгаан нь “Сэлбэ 20 минутын хот корпорац”-аас хариуцан хэрэгжүүлж буй төслийн хүрээнд нийт 8575 айлын 113 блок барилгын ажлыг 2026-2027 онд эхлүүлэн ашиглалтад оруулна. Тэдгээрийг борлуулснаар 438 тэрбум төгрөгийг нэмж төвлөрүүлнэ хэмээн төсвийн тодотголд тусгажээ.

Харин зарлага талаас Хөрөнгө оруулалтын зардалд 371.7 тэрбум төгрөгийн нэмэлт санхүүжилт тусгасны 350 тэрбум нь дангаараа “Улаанбаатар трам” төсөл  гэжээ. Тус төслийн хувьд үр ашгийн тооцоо ч хийгдээгүй гэдгийг ИТХ-ын төлөөлөгчид хэлж байна. 

Мөн нийслэл Дулааны тавдугаар цахилгаан станц төсөлд зориулан 200 тэрбум төгрөгийн бонд гаргаж, санхүүжилтэд зарцуулахаар тусгасан байна. “Улаанбаатар хотын хий хангамжийн удирдлагын газар”-т 1.3 тэрбум, “Улаанбаатар кабель кар” ОНӨТҮГ-т 2.4 тэрбум, “Сүү” хөтөлбөрийг өргөжүүлж, дотоодын аж ахуй нэгжүүдийг дэмжиж хөнгөлөлттэй зээл олгоход 5 тэрбум, ашиглалтын шаардлага хангахгүй түүхэн дурсгалт газруудыг сэргээн засварлах судалгаанд 100 сая төгрөгөөр нэмж зарцуулах аж.

Эдгээр үзүүлэлтээр нийслэл хот 2026 онд хамгийн багадаа 600 тэрбумаас 1.2 их наяд төгрөгийн алдагдалтай ажиллах дүр зураг харагдаж байгааг зарим төлөөлөгчид шүүмжилж байна.