Э.Батшугар: АН төрийн мэдээллийн Хур системээс мэдээлэл татаж Хувь хүний мэдээллийн тухай хуулийг зөрчиж байна

Э.Батшугар: "АН төрийн мэдээллийн Хур системээс мэдээлэл татаж байна. Хувь хүний мэдээллийн тухай хуулийг зөрчиж ашиглаж байна. Мэдээллийг авч хадгалж байгаа бол иргэнээс заавал зөвшөөрөл авна. Энэ мэдээллээ ил болгохгүй. Хадгалах л эрхтэй. Энэ бол иргэний аюулгүй байдлыг баталгаагүй болгож байна. Энэ бол хуулийн бүдүүлэг зөрчил" гэж тайлбар хийлээ.

Учир нь Ардчилсан намын https://an.mn/auth/signup сайтад гишүүнчлэлээр бүртгүүлэхээр регистрийн дугаараа хийхэд тухайн иргэний E-Mongolia систем дэх бүх мэдээлэл гарч ирж байсан юм. Үүнийг сэтгүүлчид хувийн фэйсбүүк хаягтаа баримт нотолгоотой оруулж эхэлсэний дараа АН-ын вэб дэх мэдээлэл өөрчлөгдөв. 

Хэрвээ хувь хүний мэдээллийн нууцад өөрийнх нь зөвшөөрөлгүйгээр халдсан бол: 

Эрүүгийн тухай хуулийн

13.10 дугаар зүйл. Хувь хүний нууцад халдах 1.Хувь хүний хуулиар хамгаалагдсан нууцыг хууль бусаар олж авсан, бусдад дамжуулсан бол дөрвөн зуун тавин нэгжээс таван мянга дөрвөн зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас нэг жил хүртэл хугацаагаар зорчих эрхийг хязгаарлах ял шийтгэнэ.

13.11 дүгээр зүйл.Хувь хүний нууцыг задруулах 1.Хувь хүний хуулиар хамгаалагдсан нууцыг олж мэдсэн хүн өөрийнх нь зөвшөөрөлгүйгээр задруулсан бол нэг мянга гурван зуун тавин нэгжээс арван мянган нэгжтэй тэнцэх хэмжээний төгрөгөөр торгох, эсхүл зургаан сараас хоёр жил хүртэл хугацаагаар зорчих эрхийг хязгаарлах, эсхүл зургаан сараас хоёр жил хүртэл хугацаагаар хорих ял шийтгэнэ. 

зүйл заалтуудад хамаарах юм. Одоогийн байдлаар АН-аас энэ талаар албан ёсны тайлбар хийгээгүй байна.