УИХ-ын дарга, МАН-ын дарга Н.Учрал БНХАУ-д айлчилж байна

Admin

Өчигдөр

2026.03.22-24-нд Хятадын Коммунист намын урилгаар Монгол Улсын Их Хурлын дарга, Монгол Ардын намын дарга Н.Учрал албаны бусад хүмүүсийн хамтаар айлчилж байна. Энэ айлчлалын хүрээнд Бүх Хятадын Ардын Төлөөлөгчдийн Их Хурлын Байнгын хорооны дарга, ХКН-ын Төв хорооны Улс төрийн товчооны гишүүн Жао Лөжи-тэй уулзаж, хил дамнасан төмөр замын холболтын ажлыг эрчимжүүлэх, газрын тосны бүтээгдэхүүний худалдааг нэмэгдүүлэх талаар санал солилцлоо.

Мөн хууль тогтоох байгууллага хоорондын хамтын ажиллагааг гүнзгийрүүлэх хүрээнд хоёр талын мэргэжлийн Байнгын хороод, парламентын найрамдлын бүлгүүд болон нутгийн өөрөө удирдах байгууллагууд хоорондын харилцаа, хамтын ажиллагааг өргөжүүлэх, туршлага солилцоог эрчимжүүлэх хүсэлтэй байгаагаа илэрхийллээ.

Мөн айлчлалын үеэр БНХАУ-ын робот технологийн хөгжлийг харуулсан, худалдаа, туршилт, инновацын нэгдсэн төв "Robot Mall"-аар зочилж, туршлага судалжээ. УИХ-ын дарга энэ талаараа өөрийн цахим хуудаснаа:

" БНХАУ мэс заслын эмч, үйлдвэрийн ажилтнаас эхлээд гэр ахуй, спорт зэрэг салбар бүрд роботыг хэрэглээнд нэвтрүүлжээ. Хиймэл оюун ухаан Хятадуудын өдөр тутмын амьдралын нэг хэсэг болжээ.Манай улсад ч хиймэл оюун ухаан, инновац, мэдлэгийн шийдлүүдийг төр, хувийн хэвшил, бүх шатанд нэвтрүүлэх ажил үргэлжилсээр байна" хэмээн нийтэлжээ.

Айлчлалын багт Монгол улсын гурав дахь Ерөнхийлөгч Н.Энхбаяр, МАН-ын даргын ахлах зөвлөхөөр ажиллаж буй Ч.Хүрэлбаатар, МАН-ын Сургалт, судалгаа хариуцсан нарийн бичгийн дарга, Хотын дарга асан Д.Сумъяабазар болон бусад албаны хүмүүс ажиллаж байна.