​М.Нарантуяа-Нара: Хуулийн төсөл өргөн барилаа 

УИХ-ын гишүүн М.Нарантуяа-Нара:

Би 2025 оны УИХ-ын намрын чуулганаар 2026н оны хаврын чуулганд багтаан УИХ-ын Гишүүнийг Эгүүлэн Татах Тухай Хууль санаачлан өргөн барина гэж амласан билээ. Харин өнөөдөр Монгол Улсын Их Хурлын тухай хуульд нэмэлт, өөрчлөлт оруулах тухай хуулийн төслөө өргөн мэдүүллээ. Хуулийн төсөл батлагдсанаар эдийн засаг, нийгэм, хууль зүйн хувьд дараах үр дүн гарна гэж үзэж байгаа юм. 

Үүнд:

•  Монгол Улсын Их Хурлын тухай хуулийн зарим зүйл, заалт Үндсэн хуульд нийцэж, Үндсэн хуулийн зөрчил арилна.
• Улсын Их Хурлын гишүүдийн хариуцлага нэмэгдэж, хууль дээдлэх зарчим бодитойгоор биелэгдэнэ.
• Иргэд, сонгогчид Үндсэн хууль зөрчсөн Улсын Их Хурлын гишүүнд холбогдуулан Үндсэн хуулийн цэцэд өргөдөл, мэдээлэл гаргах хүрээ хязгаар нэмэгдэх төдийгүй Үндсэн хуулийн цэцийн бие даасан байдал сайжирч, цэцийн дүгнэлт эцсийн шийдвэр болно.

Өнөөг хүртэл Улсын Их Хурлын гишүүний хувиар хуулийн хариуцлага хүлээсэн тохиолдол байхгүй байх төдийгүй Улсын Их Хурлын гишүүнийг Үндсэн хууль болон бусад хуулийг зөрчсөнтэй холбогдуулан иргэд өргөдөл, мэдээлэл гарган шийдвэрлүүлэх эрх зүйн орчин хязгаарлагдмал, Монгол Улсын Үндсэн хууль болон Монгол Улсын Их Хурлын тухай хуулийн зарим зохицуулалт хэрэгжихгүй үхмэл болж байна.

Иймд Монгол Улсын Их Хурлын тухай хуулийн зарим зүйл, заалтыг Үндсэн хуульд нийцүүлэх,
хууль зөрчдөг, нийтийн эрх ашгийг умартсан Улсын Их Хурлын гишүүнийг эгүүлэн татах боломжийг нээж, Үндсэн хууль болон бусад хуулийг зөрчсөн, өргөсөн тангаргаасаа няцсан парламентын гишүүнд бодитой хариуцлага хүлээлгэдэг эрх зүйн зохицуулалтыг бий болгох улс төрийн эерэг соёл, хандлагыг төлөвшүүлэх зохицуулалтын орчныг сайжруулах хүрээнд энэхүү хуулийн төслийг санаачлан боловсруулж, өргөн мэдүүллээ.