Төрийн албаны ерөнхий шалгалтад улсын хэмжээгээр 2321 иргэн бүртгүүлжээ

2026 оны хоёрдугаар улирлын төрийн албаны ерөнхий шалгалт өнөөдөр орон даяар эхэллээ. 

Энэ удаагийн шалгалтад оролцохоор Улаанбаатар хотод 1157, улсын хэмжээнд 2321 иргэн бүртгүүлсэн байна. Улаанбаатар хотод Төрийн албаны ерөнхий шалгалт 2026 оны тавдугаар сарын 18–21-ний өдрүүдэд үргэлжилнэ. Өдөрт дөрвөн ээлжээр, нэг ээлжид 100 иргэн шалгалт өгөх юм.

Харин 2026 оны нэгдүгээр улирлын шалгалтад Улаанбаатарт 1532 иргэн бүртгүүлж, 1049 иргэн шалгалт өгсөн. Үүнээс 458 иргэн ерөнхий мэдлэг, 410 иргэн монгол хэл бичиг, 365 иргэн дүн шинжилгээ хийх чадварын шалгалтад тус тус тэнцсэн. Ингэснээр оролцогчдын 34.8 хувь буюу 365 иргэн нөөцөд бүртгэгдэх болзол хангасан.

Төрийн албаны ерөнхий шалгалт цахим хэлбэрт бүрэн шилжсэнээр ил тод, нээлттэй, хөндлөнгийн нөлөөлөлгүй явах нөхцөл бүрдсэн юм.