Гадаад валютын нөөц өмнөх оны мөн үеэс 52 хувиар өсөв

Сүүлийн саруудад хэрэглээний бүтээгдэхүүний импортын өсөлт эрчимжиж буй нь валютын гадагшлах урсгалыг нэмэгдүүлжээ

Монгол Улсын гадаад валютын албан нөөц гуравдугаар сарын эцсийн байдлаар 5.2 тэрбум ам.доллар давж, өмнөх сараас 5.62 хувиар, өмнөх оны мөн үеэс 52 хувиар өссөнийг Монголбанк мэдээллээ.

2024 он гарсаар гадаад бондын өндөр дүнтэй төлбөрүүд хийгдсэн ч мөнгөний хатуу бодлогыг тууштай хэрэгжүүлж, экспортын өсөлт өндөр байсан нь валютын цэвэр орох урсгалыг дэмжиж байна.

Хэдий тийм боловч сүүлийн саруудад хэрэглээний бүтээгдэхүүний импортын өсөлт эрчимжиж байгаа нь валютын гадагшлах урсгалыг нэмэгдүүлжээ.

“2024 онд төсвийн зардлын өсөлтөөс гадна хэрэглээний зээлийн өндөр өсөлттэй холбоотойгоор импортын эрэлт нэмэгдэх нь төлбөрийн тэнцэлд сөргөөр нөлөөлнө. Гэхдээ дэлхийн зах зээл дэх эрдэс бүтээгдэхүүний үнийн цаашдын хандлага ч төлбөрийн тэнцэлд нөлөөлөх”-ийг Монголбанкны Ерөнхийлөгч онцолж байсан юм