ЗУРХАЙЧ Л.ТЭРБИШ: ӨРГӨН ОЛНОО ШИРҮҮН ЖИЛ БОЛНО

Энэ жил шинийн нэгэнгүй гэдэг нь билгийн тооллын шинэ жилийн эхний өдөр шинийн хоёрны сар харагдана гэсэн үг. Шинэ жилийн анхны өдөр л мөрөө гаргадаг нь нийтийн тогтсон ёс юм. Сарны хэлбэр дүрсийг сайн мэддэг хүмүүст хоёрны өдрийн сар харагдана. Нар, сараа шинжиж сурсан хүмүүст асуудалгүй дээ.

Үхэр хөтөлсөн хүүгээр монголчууд ирэх жилийнхээ өнгийг шинжвэл "Могой" жилд:  Энэ жилийн “Шороон үхэр” нь амаа хамхин сүүлээ баруун тийш шарвасан үхрийн толгой нь ногоон, ходоод нь улаан, бие нь улаан, эвэр, сүүл, чих нь хөх, омруу нь цагаан, дөрвөн шийр ногоон. Үхэрчин нь ногоон дээлтэй, цагаан бүстэй, мяндсан шилбүүр барьсан, зүүн гутлаа өмсөж, баруун гутлаа зүүн талдаа хавчуулсан, үс нь хоёр чихний ар руу хийссэн шар царайтай залуу хүмүүн үхрийнхээ өмнө гүйж явна. “Шороон үхэр”-ийн шинжээр ард олон амгалан, адуу мал тэргүүтэнд ширүүвтэр, жилийн дундуур гандуу, хур ус татруухан, өвгөдөд ширүүвтэр, өргөн олноо ширүүн жил болно.

XVII жарны “Элдэв эрдэнэт” хэмээгч модон могой жилийн үр эе эеэ хичээвэл ихээхэн өгөөжтэй жил айсуй. “Ноёд хэрэлдвэл ногоо ургадаггүй” гэдэг юм манай өтгөс. Түүнийг дээр дооргүй санавал болчихно доо.