1984: Том ах бол О Брайн, тэр бол Ц.Төмөрхуяг...

Театрын тайзыг сүмогийн дэвжээ адил үзэгчдийн суудлын голд зассан нь содон агаад дөрвөн талаас цоо ширтэх гярхай үзэгчдийн харц, бодох эргэцүүлэхийн уулзвар дунд “тоглоно” гэдэг жүжигчдийн хувьд ч сонин, шинэлэг бас амаргүй ч байж мэднэ. Энэ бол найруулагчийн шийдэл, үзэгчдийг бүтээлдээ автуулж, бодуулж, сэрдхийлгэж чадсан жүжигчдийн ур чадварын хэлхээс аж. Жорж Оруэлл "1984" роман 2021 онд монгол хэлнээ хөрвүүлэгдсэнээс хойш уншигчдын анхаарал татаж, хэлэлцүүлэг өрнөөд байх тэр үед “барьж авсан” юм. Үнэхээр унших ёстой, уншаад бодох учиртай, нэгэн хэвийн хэмнэл, ахуйд дасчихсан бол сэтгэлгээндээ салхи оруулахуйц бүтээл мөн байв.   Английн алдарт зохиолч Жорж Оруэлл амьдралынхаа сүүлийн жилүүдэд эрүүл мэндийн хувьд дор орсон хойноо 1948 онд бичиж дуусгасан зохиол. Нас барсных нь дараа хэвлэгдэж, дэлхий дахинаа шуугиан тарьсан сүүлчийн зохиол нь түүнийг дахин алдаршуулсан юм.    "Орфей" театрынхан, найруулагч Мягмарнарангийн Батболд “1984”-ийг жүжиг болгон энэ өдрүүдэд үзүүлж байна. Гол дүрийн шаналал, эмзэглэл бүхий өрнөл, эцэст нь сэтгэлгээний эрх чөлөөгөө алдаж буй гунигт явдлууд гол дүр Уинстин Смитийн бодлоор илэрхийлэгддэг энэ зохиолыг найруулагч ямар шийдэл гаргаж тайзны бүтээл болгосон бол.... гэсэн бодол тээсээр “Улаанбаатар” зочид буудлыг зорив оо.

...Ангсоц намын эрх мэдэл хязгаараас давж, намын үзэл суртал, сайн сайхныг таниулах пропаганда хүчээ авч, намын лидер Том ахыг тахин шүтэх үзэл уриа дуудлага болжээ. Хүн төрөлхтөний түүхийн бүх цаг үед “дээдчүүл, дундчуул, доодчуул” гэх гурван давхарга байсан нь бичигдээгүй хууль. Бидний амьдран буй энэ цаг үед ийм давхарга бий бил үү, та анзаараад үзээрэй.