Хуурамч долларын залилан үйлдсэн гадаадын 2 иргэнийг баривчилжээ

Монгол Улсад ирсэн гадаад улсын хоёр иргэн Монгол Улсын иргэнд хуурамч ам.доллар ашиглан мөнгө өсгөж, ашиг олох санал тавьжээ.

Хохирогч уг үйлдлийг хууль бус болохыг мэдэж байсан хэдий ч саналыг хүлээн авсан байна. Улмаар дээрх хоёр иргэн зохиомол нөхцөл байдал үүсгэн, түүнийг залилж, 250 мянган ам.доллар буюу ойролцоогоор 900 сая төгрөг, мөн 30 орчим сая төгрөгийн үнэ бүхий үнэт эдлэлийг авчээ.

Хэргийг үйлдсэн гэх гадаадын хоёр иргэн Монгол Улсын хилээр гарахыг завдсан байна. Энэ үед Чингэлтэй дүүргийн Цагдаагийн газрын Нэгдүгээр хэлтсийн алба хаагчид тэднийг “Чингис хаан” олон улсын нисэх буудлаас дайчлан баривчилж, саатуулан шалгаж байгаа юм байна.