Ногоон автобусны сонсгол энэ сарын 21,22-нд болно

"Ногоон автобус"-ны худалдан авах ажиллагаанд хяналт шалгалт хийх үүрэг бүхий УИХ-ын түр хорооны дарга УИХ-ын гишүүн Ж.Бат-Эрдэнэ мэдээлэл хийж, 5 сарын 21,22-нд сонсгол болох талаар зарлалаа. 

УИХ-ын гишүүн Ж.Бат-Эрдэнэ: Гурван асуудлын хүрээнд сонсгол явагдана. 

1. Худалдан авах ажиллагаатай холбоотой асуудал

2. Хуулийн хүрээнд ажиллаж байсан уу гэдэг асуудал 

3. Ногоон автобусны чанар, стандарттай холбоотой асуудал гэсэн хүрээнд иргэдэд мэдээлэл өгнө гэлээ. 

Энэ хүрээнд төрийн хяналт шалгалтын хуулийн дагуу үйл ажиллагаа явуулдаг төрд тангараг өргөсөн хүмүүс шинжээчээр ажилласан бөгөөд сонсголд Монгол Улсын сайд, Улаанбаатар хотын түгжрэлийг бууруулах үндэсний хорооны дарга асан Ж.Сүхбаатар, Улаанбаатар хотын түгжрэлийг бууруулах үндэсний хорооны албаны дарга Ц.Батгэрэл, Нийслэл засаг дарга бөгөөд Улаанбаатар хотын захирагч асан Д.Сумъяабазар, Нийслэлийн засаг даргын нэгдүгээр орлогч Ж.Сандагсүрэн, Нийслэлийн засаг даргын ахлах зөвлөх Д.Мөнх-Эрдэнэ, Тэнүүн-Огоо компани захирал болон бусад холбогдох 20 гаруй хүнийг гэрчээр дууджээ. 

Тус хэрэгтэй холбоотойгоор NTV Телевизээр хотын экс дарга Сумъяабазар зарим нэгэн мэдээллийг дэлгэж, улс төрийн шинжтэй үйл ажиллагаа болсныг ярьсан. Тэгэхээр ногоон автобусны гэх хэрэг нь зохион байгуулалттай үйлдсэн хэрэг үү, эсвэл худалдан авалтын явцад цавчаа хийх гээд асуудал үүссэн үү гэдгийг сонсголоос иргэд илүү нээлттэй мэдэж авах боломжтой болж байгаа юм.