“Мөнгөн алиалагч” цом авсан циркчдийг 40 сая төгрөгөөр шагнана

Монакогийн Вант Улсын Монте Карло хотод өнгөрсөн нэгдүгээр сарын 19-29-ний өдрүүдэд дэлхийн циркчдийн олимп хэмээн нэрлэгддэг “Монте Карло-46” их наадам болсон.

Энэ наадамд Монгол Улсыг төлөөлөн “Трүүп Амараа” хамтлаг "Хүннү гүрэн" бүтээлээрээ оролцож “Мөнгөн алиалагч” цомын эзэд болсон билээ. Дэлхийн циркчдийн олимпод монгол циркийн чанар, түвшнийг таниулан сурталчилж, түүхэн амжилтыг бататгасныг үнэлэн Засгийн газрын 2008 оны 120-р тогтоолын дагуу 40 сая төгрөгийн мөнгөн шагналыг "Трүүп Амараа" хамтлагт олгоно.

Тус бүтээл нь “Монта Карло – 46” их наадмын алтан тайзнаа анх удаа зургаа давхарласан хүн рүү хоёр эргэлт хийж, дөрөв давхарласан 9,5 метр өндөр турбатай сандал руу хойшоо хоёр эргэлттэй нисэх, шидэх банзнаас хойшоо агаарт таван сальто эргэлт хийх үзүүлбэрийг зориглон үзүүлсэн нь шинэлэг бөгөөд анхдагч байсан гэж Соёлын яамнаас мэдээлэв.

1986 онд Монголын циркийн уран бүтээлчид “Хос уран нугаралт”-ын төрлөөр тус наадамд амжилт үзүүлж, “Мөнгөн алиалагч” цомын эзэд болж байжээ.

“Трүүп Амараа” хамтлаг "Хүннү гүрэн" бүтээлийг энэхүү холбоосоор зочлон үзэж сонирхоорой.