​ТӨРИЙН ХЯНАЛТ ШАЛГАЛТЫН ТУХАЙ ХУУЛИЙН ШИНЭЧИЛСЭН НАЙРУУЛГЫН ТӨСЛИЙН ҮЗЭЛ БАРИМТЛАЛЫН ТӨСЛИЙН ХЭЛЭЛЦҮҮЛЭГ ҮРГЭЛЖИЛЖ БАЙНА

Эдийн засаг, хөгжлийн яам болон Засгийн газрын Хяналт хэрэгжүүлэх газар хамтран зохион байгуулсан Төрийн хяналт шалгалтын тухай хуулийн шинэчилсэн найруулгын төслийн үзэл баримтлалын төслийн хоёр дахь өдрийн хэлэлцүүлэгт 10 яам, агентлагийн 31 улсын байцаагч оролцлоо.

Тодруулбал, цахилгаан хангамж, дулаан хангамж, сэргээгдэх эрчим хүч, мэдээлэл, харилцаа холбоо, автозам, төмөр зам, усан зам, байгаль орчин, геологи, уул уурхай, газрын тос, хий, цөмийн болон цацрагийн аюулгүй байдал, газар, геодези, зураг зүй, хэмжил зүй, боловсрол, соёл, соёлын өв, аялал жуулчлалын салбарын улсын байцаагчид оролцож, салбар бүрт тулгамдаж буй асуудал, эрх зүйн зохицуулалтын хэрэгцээ, практикт тулгарч буй хүндрэлүүдийн талаар санал солилцов.

Хэлэлцүүлгийн үеэр төрийн хяналт шалгалтын тухай хуулийн хэрэгжилтийн үр дагаврын судалгаа, олон улсын сайн туршлага, шинэчилсэн найруулгын төслийн үзэл баримтлалыг танилцуулж, эрсдэлд суурилсан, ил тод, давхардалгүй, иргэн, бизнес эрхлэгчдэд ээлтэй төрийн хяналтын тогтолцоог бүрдүүлэхэд чиглэсэн зохицуулалтын талаар нээлттэй хэлэлцүүлэг өрнүүлэв.

Оролцогчид салбарын онцлогт нийцсэн хяналт шалгалтын тогтолцоог бүрдүүлэх, хяналтын үр нөлөөг дээшлүүлэх, хууль хэрэгжүүлэх явцад үүсдэг хүндрэл, эрх зүйн зохицуулалтын давхардлыг арилгах чиглэлээр санал, зөвлөмжөө өгч, хуулийн төслийг илүү боловсронгуй болгоход бодитой хувь нэмэр орууллаа.

Төрийн хяналт шалгалтын тухай хуулийн шинэчилсэн найруулгын төслийн хэлэлцүүлэг нь төрийн байгууллага, иргэн, аж ахуйн нэгжийн оролцоонд тулгуурлан хуулийн төслийг боловсронгуй болгох зорилготой бөгөөд цаашид үе шаттайгаар зохион байгуулагдах юм.