​Нийслэлийн МАН 99 нас хүрлээ 

МАН 103 жилийн настай бол харин тус намын хамгийн том салбар бүтэц болох нийслэлийн МАН 99 жилийн ойтойгоо өнөөдөр золгож байна. 99 жилийн түүхэнд МАН 36 даргатайгаар үйл ажиллагаа явуулсан бөгөөд 36 дахь нийслэлийн МАН-ын даргаар Д.Сумъяабазар ажиллаж байгаа юм. Тэрээр даргаар ажиллах хугацаандаа Монгол улсын хүн амын 50 хувь нь оршин суудаг их хотод МАН-ыг хоёр удаагийн сонгуульд удирдан орж үнэмлэхүй олонхын ялалтыг байгуулан ажилласан төдийгүй 2024 оны УИХ-ын болон ИТХ-ийн сонгуулиудад дахин багаа ахлан ажиллах гэж байна. 

99 жилийн ойн хүрээнд нийслэлийн МАН удирдах ажилтны зөвлөгөөнөө өнөөдөр зохион байгуулж байна. Энэ үеэр нийслэлийн МАН-ын дарга Д.Сумъяабазар 2024 оны УИХ-ын ээлжит сонгуулийн бэлтгэл ажлын тухай, СХД-ийн МАН-ын хорооны дарга, Нийслэлийн засаг дарга бөгөөд Улаанбаатар хотын захирагч Х.Нямбаатар Бүсчилсэн хөгжлийн талаар илтгэл тавьж, гишүүдийн асуултад хариулт өглөө. 

Нийслэл УИХ-ын ээлжит сонгуульд 24 мандат олгоно. Одоогоор 50 гаруй горилогчоос нэр дэвшин өрсөлдөх хүсэлт ирээд байгаа юм байна. Гэхдээ УИХ-д нэр дэвших хүмүүсийг шударга зарчмаар тодруулна гэдгийг Нийслэлийн МАН-ын дарга онцоллоо.