Цахилгааны үлдэгдэл төлбөргүй өрхүүдийг шөнийн тарифын хөнгөлөлтөд хамруулна

Гэр хорооллын айл өрхийн орой,шөнийн цагаар хэрэглэсэн цахилгааны тарифын хөнгөлөлт 2017 оноос Засгийн газрын шийдвэрээр хэрэгжиж эхэлсэн. Шөнийн тариф нь жил бүрийн арваннэгдүгээр сарын 1-ээс дөрөвдүгээр сарын 1-нийг хүртэл үргэлжилдэг.

Шөнийн тарифт нийслэл болон аймгийн төв, 10 мянган дээш хүн амтай сум, суурин хамрагддаг. Дараах нөхцөлийг хангасан айл өрхийн шөнийн тарифт шилжинэ.

• Цахилгааны үлдэгдэл төлбөргүй
• Зөвхөн ахуйн хэрэгцээнд болон амьдарч байгаа гэр сууцаа халаах зориулалтаар хэрэглэх
• Цагийн ялгаварт тарифт тоолууртай өрхүүд

Шөнийн тарифын хөнгөлөлтийг оройн 21 цагаас өглөөний 9:00 цаг хүртэлх хэрэглэсэн хэрэглээнд тооцно. Хэрэглэгч нь 220В-ын сүлжээнд холбогдсон бол 1500 кВт.ц хүртэлх, 380В-ын сүлжээнд холбогдсон бол 3000 кВт.ц хүртэлх хэрэглээг 100 хувь, хязгаараас давсан хэрэглээг 50 хувь хөнгөлдөг.