Өмнөговь аймаг төсөвт 1,4 их наяд төгрөг төвлөрүүлсэн ч өөрсдөө ХООСОН хоцорчээ 

Монголын улсын 2024 оны төсөв 2,7 их наядын алдагдалтай, төсвийн зардал 10 хувийн өсөлттэй явж байгаа талаар эдийн засагчид тооцоолол боловсруулсан. Тэгвэл УИХ-ын ээлжит бус чуулганаар баталсан 2024 оны Төсвийн тодотголд зарим орон нутгийн төсөв захирагчдын ачааллыг нэмж тооцсоноор томоохон мега төслүүд царцахад хүрээд байна.  

Тодруулбал, Өмнөговь аймаг 2024 оны Төсвийн тухай хуулиар улсад 720 тэрбум төгрөг төвлөрүүлэх үүрэг хүлээсэн байжээ. Оны эхний хагас жилд тэд ажлын хэсэг байгуулан энэ үүргээ биелүүлэн ажилласан боловч УИХ-ын ээлжит бус чуулганаар батлагдсан төсвийн тодотголоор дахин 740 тэрбумыг төвлөрүүлэх үүрэг хүлээлгэж, ачааллыг  нь нэмжээ.

2024 онд Өмнөговь аймагт 1,4 их наяд төгрөгийн төсөв баталж, энэ мөнгийг Засгийн газар эргүүлэн 100 хувь буцаан авч буй гэж энгийнээр тайлбарлаж болно. Гэвч ингэснээр улсын шинж чанартай Өмнөговь аймагт хэрэгжихээр төлөвлөсөн томоохон төслүүд царцахад хүрээд байна. Иймд 2025 оны Төсвийн тухай хуулинд тус аймаг хөрөнгө оруулалтын төслүүдээ урагшлуулах асуудлыг оруулж өгөхиГ хүсч байна. 

 Монгол улсын уул уурхайн гол бүс нутаг болсон Өмнөговь аймаг Засгийн газрын өмнө хүлээсэн үүргээ биелүүлж, төсөв төвлөрүүлэх хариуцлагаа жил бүр биелүүлдэг ч эргээд аймагт нь төсвийн хөрөнгө оруулалт байхгүй байгаа нь бусад аймагтай харьцуулахад шударга бус гэж үзэж байна. Тэд 2025 онд өөрсдийн улсад төвлөрүүлж байгаа төсвөөсөө эргүүлээд 30 хувийг нь хөрөнгө оруулалт байдлаар аймагтаа зарцуулж, бүтээн байгуулалтын эхлүүлсэн ажлуудаа урагшлуулах хүсэлтэй байгаа юм.