Улаан загалмайн Зүүн хойд Ази дахь хангамжийн агуулахыг Монгол улсад байгуулах талаар ярилцлаа
НҮБ-ын Ерөнхий Ассамблейн 79 дүгээр чуулганд оролцож буй Монгол Улсын Ерөнхийлөгч Ухнаагийн Хүрэлсүх, Олон улсын улаан загалмай хороо (ОУУЗХ)-ны Ерөнхийлөгч Мирьяана Эггерийг хүлээн авч уулзлаа.
Уулзалтын үеэр ОУУЗХ-ны хүмүүнлэгийн үйл ажиллагааг дэмжих зорилгоор Зүүн хойд Ази дахь хангамжийн агуулахыг Монгол Улсад байгуулах, хүмүүнлэгийн тусламжийн бүтээгдэхүүний багцыг нийлүүлэхэд цаашид хамтран ажиллах боломжийн талаар санал солилцов.
Монгол Улсын Ерөнхийлөгч Ухнаагийн Хүрэлсүх Улаанбаатар хотноо энэ оны наймдугаар сарын 22-23-ны өдөр амжилттай зохион байгуулагдсан “Дэлхийн эмэгтэйчүүдийн чуулга уулзалт”-д ОУУЗХ-оос төлөөлөгч оролцсоныг тэмдэглэж, ОУУЗХ-ын Ерөнхийлөгч Мирьяана Эггерийг Монгол Улсад тааламжтай цагтаа айлчлахыг урив.
Онцлоход: Зүүн хойд Ази дахь Улаан загалмайн хангамжийн агуулахыг Манай улсад байгуулвал дотоодын үйлдвэрүүдийн бараа бүтээгдэхүүнийг нийлүүлэх, эдийн засгийн эргэлтэд хувь нэмэр оруулах, үйлдвэрлэгчдээ шууд бусаар дэмжих нэг том гарц болно гэж ерөнхийлөгч үзэж байгаа юм байна.
