“Монгол хаан” жүжиг Сингапурт 22 удаа амжилттай тоглолоо

Admin

2024/11/04

Монгол хаан жүжгийн багийнхан Сингапурын алдарт Марина Бэй Сээндс театрт 22 удаагийн тоглолтыг хийж 10 удаа англи хэлээр, 12 удаа монгол хэлээр нийт 30 мянга гаруй үзэгчдэд жүжгээ үзүүлжээ.

Тус жүжигт Азийн соёлын тэргүүлэх компаниудын нэг "Base Entertainment Asia" хөрөнгө оруулалт хийж, хамтран продюсерлэжээ.

"Монгол хаан" жүжгийн Сингапур дахь тоглолт нь Монголын урлагийн зах зээлд анх удаа олон улсаас хөрөнгө оруулалт татаж, зах зээлийн өрсөлдөх зарчмаар олон улсад тоглолт хийсэн анхны тохиолдол болсон байна.

“Монгол хаан” жүжгийн гол дүрийг бүтээсэн МУГЖ Г.Эрдэнэбилэг, МУГЖ С.Болд-Эрдэнэ, МУГЖ С.Доржсүрэн, МУГЖ У.Уранчимэг, О.Дөлгөөн, О.Самданпүрэв нар англи хэлээр ээлжлэн тоглож, олон улсын үзэгчид талархалтайгаар хүлээж авсан нь Монгол жүжигчдийн ур чадвар олон улсын түвшинд хүрснийг харуулж чадлаа.

Тус жүжгийн англи хувилбарын гол дүрүүдийг Нетфликсийн цувралуудаар алдаршсан Холливүүдийн жүжигчин Рон Юан, Марк Дакаскос, Леонард Ву, мисс А.Баярцэцэг, Америкт жүжигчнээр ажилладаг жүжигчин Занабазар нар бүтээсэн нь Монгол жүжигт Холливудын жүжигчид Монгол хүмүүс болон хамтран тоглосон анхны тохиолдол болсноороо онцлогтой юм.

“Монгол хаан” жүжгийн Сингапур дахь тоглолтыг АНУ, БНХАУ, Япон, Өмнөд Солонгос, Турк, Арабын булангийн орнууд, Их Британи, Австрали зэрэг улсын продюсинг 10 орчим компанийн төлөөлөл үзэж, 2025-2026 оны аялан тоглолтуудын Санамж бичгүүдийг үзэглэжээ.