Монгол улсын 44 иргэн хар тамхины хэргээр гадны улс орнуудад ял эдэлж байна
Хар тамхи, мансууруулах бодистой холбоотойгоор Монгол улсад БНХАУ-ын нэг иргэн ял эдэлж байгаа бол, харин Монгол улсын 44 иргэн гадны улс орнуудад энэ хэргээр ял эдэлж байна. Эдгээр иргэдийн 37 нь БНХАУ, 3 нь Турк, Германд 2, БНСУ болон Японд тус бүр нэг нэг иргэн гэсэн мэдээлэл байна. Мөн энэ хэргээр яг өнөөдрийн байдлаар гадны улс орнуудад Монгол улсын долоон иргэн саатуулагдан шалгагдаж байна.
Олон улсын тооцоолол хийдэг аргуудаар авч үзвэл манай улсад 30-50 мянган иргэн хар тамхи, мансууруулах бодис хэрэглэдэг гэсэн тоо гарчээ. Цаашлаад энэ тоо 2030 он гэхэд нийт хүн амын 43 хувьтай тэнцэнэ гэсэн судалгаа гарсан байна. Тиймээс яг одооноос эхэлж энэ төрлийн гэмт хэргийг таслан зогсоох, донтолттой тэмцэх зайлшгүй шаардлагатай болоод байна.
Ялангуяа бага насны хүүхдүүд энэ төрлийн буруу ташаа мэдээлэл авснаас болж гар, хөлөө тайруулах, амь насаа алдах хүртэл аюул эрсдэлд ороод байгааг томчууд бид хараад суух нь зохимжгүй. Тиймээс энэ төрлийн гэмт хэргээс урьдчилан сэргийлэхийн тулд үнэн, зөв мэдээ мэдээллийг түгээх сургалтыг Хар тамхитай тэмцэх газартай хамтран зохион байгуулна, энэ ажилд мөн Есүс Христийн хожмын үеийн гэгээнтнүүдийн сүм оролцож байгаа талаар БЗД-ийн ИТХ-аас мэдээллээ.
