Б.Баярцэцэг: Миний элэнц өвөө БОГД ХААНЫ ордонд дуучин байсан түүхтэй
Дуун дотроо орж дуулна гэдгийг рок попынхон дундаас яруу тодоор харуулсан дуучин бол Б.Баярцэцэг. Анх Люмино хамтлагийн ХҮНИЙХ дууг хамтран дуулж тухайн үеийнхээ супер хит болж байсан тэр л дуучин бол өдгөө бидний уянгалаг чамин хоолойт хэмээн нэрлэдэг Б.Баярцэцэг билээ. Дуулсан дуу брийнхээ үг, аяны яруу тансагийг олж, яг л тэр мэдрэмжээр нь сонсож буй хүмүүнд дамжуулан дуулдаг нь түүний бусад дуучдаас ялгарах ялгарал байх.
Санхүүч мэргэжлээр төгссөн ч дуулсан хэвээрээ дуучин бүсгүй гэр бүлээсээ ганцаараа дуулж яваа. Харин түүний удамд элэнц өвөө нь Богд хааны ордонд дуучин байсан бөгөөд өвөө, эмээгийнх нь талд туульч, зохиолч гээд уран бүтээлчид байдаг ажээ.
Хайрын, байгалийн, амьдралын, кино уран бүтээлүүдийн, жүжгийн олон арван төрөл жанрын дууг 20 орчим жил бидэнд өөрөөрөө дамжуулан хүргэж ирсэн дуучин Б.Баярцэцэг энэ оны 3 сарын 7,8-нд хоёр өдрийн турш ээж, эх хүн, эх үрсийн элбэрэлийн талаар дуулж, мөн бусад хит уран бүтээлүүдээ өргөн барьж тоглолт хийхээр товоо тогтоожээ. АСА АРЕНА-д болох тус тоглолтын тасалбарыг ирэх 7 хоногоос онлайнаар худалдаанд гаргах юм байна. Түүний уран бүтээлүүдээс "Таньруу нүүж явна" хамгийн их хандалт авч байсан бол супер хит болж байсан "Содон аялгуу" дууг та бүхэнд хүргэж байна.
