108 мянга орчим нас барсан хүний 1072 хувьцааг шийдвэр гарсан тохиолдолд ар гэрт нь өвлүүлнэ

Эрдэнэс Тавантолгойн 1072 хувьцааны 2024 оны ногдол ашиг болох 350 мянган төгрөгийг гурван удаа хувааж иргэдэд олгохоор шийдвэрлэсэн. Эхний буюу ногдол ашгийн урьдчилгааг 2025 нэгдүгээр сард тараасан. Татваргүй дүнгээр 135 мянган төгрөг, татварын дараах дүнгээр 121,500 төгрөгийг хувьцаа эзэмшиж байгаа иргэдийн дансанд ногдол ашиг гүйлгээний утгатай орсон.

Энэ баасан гараг буюу 2 сарын 28-нд олгогдох ногдол ашиг татвар хасагдсан дүнгээр 100 мянган төгрөг орох бол, 3 дахь удаагийн олголт татвар хасагдсан дүнгээр 96 мянган төгрөг хувьцаатай иргэдийн дансанд шилжих юм байна.

Өнөөдрийн байдлаар 3,407,926 иргэн "Эрдэнэс Тавантолгой" ХК-ийн 1072 хувьцааг эзэмших эрхтэй байгаа бөгөөд энэ дотор нас барсан 108 мянган иргэний хувьцаа ч багтаж байгаа юм байна

Төрийн сан дахь Үнэт цаасны төвлөрсөн хадгаламжийн төвийн дансанд нас барсан хүмүүсийн ногдол ашгийн мөнгө хадгалагдаж байгаа гэсэн үг. 

1072 ширхэг хувьцааны тухайд өнөөдрийн зохицуулалтаар төрдөө худалдахаас өөр хэлбэрээр захиран зарцуулахыг хориглосон байгаа. Тэгэхээр магадгүй өнөө, маргаашдаа УИХ-аас шийдвэр гарч, "Эрдэнэс Тавантолгой" ХК-ийн хувьцааг өв залгамжлуулах эрхийг нээлээ гэх шийдвэр гарвал нас барсан хүний ар гэр нь хувьцаа, ногдол ашгийг өвлөх эрх нээгдэнэ. Өв залгамжлалын эрхтэй холбоотой шийдвэр гараад хэрэгжиж эхэлбэл гэдгийг харгалзаж нотариатын байгууллагатай хамтран ажиллах харилцан ойлголцлын санамж бичиг байгуулаад явж байна. Өөрөөр хэлбэл, өв залгамжлалтай холбоотой эрх бол олон дахин нааш, цааш явах, бичиг баримт бүрдүүлэх шаардлагатай учир эртнээс урьдчилан бэлэн байдлаа хангаж байгаа гэж ойлгож болно хэмээн "Үнэт цаасны төвлөрсөн хадгаламжийн төв" ХХК-ийн Захиргаа хууль эрхзүй, санхүүгийн газрын захирал Ж.Амарсайхан мэдээлжээ.