Шилийн богдод гарсан иргэд гал алдсан уу?
Он гарсаар улсын хэмжээнд Архангай аймгийн Хайрхан, Дорнод аймгийн Хэрлэн, Баян-Уул, Булган, Цагаан-Овоо, Дашбалбар, Чойбалсан, Сүхбаатар аймгийн Асгат, Эрдэнэцагаан, Хэнтий аймгийн Баян-Овоо, Батширээт сум буюу нийт 4 аймгийн 11 суманд 14 удаагийн ой, хээрийн гал түймэр бүртгэгдлээ.
Өнөөдөр өглөө Дорнод аймгийн Хөлөнбуйр суманд Хэнтий аймгийн Баян -Овоо сумаас орж ирсэн гал нэгэн малчин өрхийн 27 жилийн хөдөлмөрийг нь үгүй хийж 700 гаруй мал болон бусад эд хөрөнгө нь галд өртжээ.
Тус галыг одоогоор эргэн тойрны иргэд айлын өвөлжөөг санаатайгаар шатаах оролдлого байсан гэж таамаглаж байгаа юм байна. Мөн зүүн аймгуудад гарсан галыг Шилийн богд ууланд гарсан иргэд алдсан байж болзошгүй гэж үзэж байгаа юм байна.
Архангай аймгийн Хайрхан, Хэнтий аймгийн Батширээт суманд гарсан ой, хээрийн гал түймрийг цурамд оруулж, Сүхбаатар аймгийн Асгат, Эрдэнэцагаан суманд гарсан хоёр хээрийн түймрийг унтраахаар ажиллаж байна.
Ой, хээрийн түймрээс урьдчилан сэргийлэх арга хэмжээг улсын хэмжээнд зохион байгуулж байгаа хэдий ч иргэдийн болгоомжгүй үйлдлээс түймрийн тоо, хохирол буурахгүй байна. Иймд иргэд та бүхэн хаврын хуурайшилттай өдрүүдэд цогтой үнс нурмыг зориулалтын саванд хийх, түймрийн эрсдэлтэй сумдад зорчихдоо татсан тамхиа бүрэн унтраах, автомашины бүрэн бүтэн байдлыг хангах, хог хаягдлыг ил задгай шатаахгүй байхыг онцгойлон анхааруулж байна.
