Хүүхэд моринд чирэгдэж амиа алдсан хэрэг гарсныг нуусан уу?
Төв аймгийн Сэргэлэн сумын нутагт байрлах "Урд 61" гэгдэх уяачдын хороололд хүүхэд морины ажил хийх явцдаа мориндоо чирэгдэж амиа алдсан хэрэг гарсан талаар www.isee.mn сайтад гарсан мэдээллийн дагуу манай редакциас Төв аймгийн Сэргэлэн сумруу холбогдож, мэдээллийг нягтлахад "ийм явдал болсон нь үнэн" гэсэн хариуг өглөө. Бидний өөр эх сурвалжийн мэдээллээр энэ хэрэг 2025 оны 3 дугаар сарын 13,14 орчимд болсон гэлээ.
Тодруулбал: Монгол улсын ТОД МАНЛАЙ уяач О.Батбилэг, Т.Ихбаяр, Б.Бат-Өлзий нарын галд дээрх золгүй явдал болжээ. Хэргийг Төв аймгийн цагдаагийн хэлтэс шалгаж байгаа бөгөөд мэдээллийг ихэд нууцалж байгаа аж. Эх сурвалжийн өгсөн мэдээллээр Цагдаагийн газар мэдээлэл хийхгүй, хав дарж байгаа гэсэн мэдээллийг бидэнд өглөө.
Монгол улсын Засгийн газраас "хурдан морь уралдуулах журам" шинээр батлахдаа аймгийн удирдлагуудад бүрэн эрхийг шилжүүлсэн. Мөн "Хүүхэд хамгааллын тухай хууль" манай улсад хэрэгжиж эхлээд хагас жил гаруй болж байна. Дээрх хууль, журмын дагуу аймаг сумын засаг дарга нар хамтарсан баг байгуулж, Хүүхэд, гэр бүл, залуучуудын хөгжлийн газар, Нийгмийн хөгжлийн хэлтэстэйгээ нягт уялдаатай ажиллах ёстой. Гэвч Төв аймгийн тухайд засаг дарга Л.Төмөрчөдөр, Сэргэлэн сумын засаг дарга Т.Гансүх нар энэ ажилд огт анхаарлаа хандуулахгүй, хамтарсан багийн ажиллагаа маш хангалтгүй байгаа гэсэн мэдээллийг өглөө.
Хэрэг гарах үед аймгийн засаг дарга Л.Төмөрчөдөр гадаадад явсан бол харин Сэргэлэн сумын засаг дарга Т.Гансүх хэргийн талаар огт мэдээлэл гаргахгүй байдалтай байгаа юм байна. Энэ хэргийг эргэн тодруулж хүргэх болно.
