Баянгол дүүрэг ОХУ-ын Буриад улсын Улаан-үд хоттой хамтран ажиллах санамж бичиг байгууллаа

“Буриад-Баянгол-2025” бизнес форум өнөөдөр (2025.03.18) боллоо. Форумд ОХУ-ын Буриад улсын 9 аж ахуй эрхлэгч, Баянгол дүүргийн жижиг дунд үйлдвэрлэл эрхлэгч 20 гаруй  иргэн, аж ахуйн нэгж байгууллага оролцож өөрсдийн үйлдвэрлэдэг бараа бүтээгдэхүүнээ дэлгэн үзүүллээ. Форумын нээлтийн арга хэмжээнд Буриад улсын Засгийн газрын  Монгол Улсыг хариуцсан сайд Даба Шагжиевич Чирипов, Баянгол дүүргийн ИТХ-ын дарга П.Өлзийнаран, Засаг дарга Ө.Сумьяабаатар болон албаны бусад хүн оролцлоо.

Энэ үеэр дүүргийн Засаг дарга Ө.Сумьяабаатар “Өнөөдөр Буриад Улсын Улаан-Үд хоттой хамтран ажиллах, манай хоёр бүс нутгийн харилцааны шинэ хуудсыг нээж, “Буриад-Баянгол 2025” бизнес форумыг зохион байгуулж байгаад баяртай байна. Энэхүү үйл явдал нь харилцан итгэлцэл, найрсаг харилцааг улам бататгаж, хамтын ажиллагааны шинэ боломжуудыг нээх чухал алхам болж байна” гэдгийг онцоллоо. 

Мөн энэ арга хэмжээний үеэр Баянгол дүүрэг ОХУ-ын Буриад улсын Улаан-Үд хоттой хамтран ажиллах санамж бичгийг байгуулсан бөгөөд Буриад улсын Засгийн газрын  Монгол Улсыг хариуцсан сайд Даба Шагжиевич Чирипов “Баянгол дүүрэг Буриадын Улаан-Үүд хоттой хамтран ажиллах санамж бичиг байгуулж байгаа нь Буриад Монголын тэр дундаа өнөөдөр хүрэлцэн ирсэн Буриадын бизнесменүүд болон Баянгол дүүргийн бизнес эрхлэгчид та бүхний хамтын ажиллагааны шинэ гарц шийдлүүд гарч байна гэж ойлгож болно. Бидний хамтын хүчин чармайлт амжилт, үр дүнд хүрч, хоёр бүс нутгийн иргэдэд бодит өгөөжийг авчирна гэдэгт итгэлтэй байна” гэсэн юм.