"АМАР БАЙНА УУ-2025" үзэсгэлэн худалдаанд Баянгол дүүргийн 75 үйлдвэр, үйлчилгээ эрхлэгч оролцож байна

Нийслэлийн Засаг даргын санаачилгаар сар шинийн баярыг угтсан "Амар байна уу-2025" үзэсгэлэн худалдааг гурав дахь жилдээ зохион байгуулж байна. Энэ жилийн хувьд тус арга хэмжээг “Их наяд” худалдааны төвийн 5-6 давхар, “Соёолж молл” худалдааны төвийн хоёрдугаар давхарт зохион байгуулж байгаа юм.

Тэгвэл өнөөдөр  Баянгол дүүргийн Засаг даргын Тамгын газар, дүүргийн Жижиг дунд үйлдвэрлэл үйлчилгээг дэмжих төв хамтран “Их наяд” худалдааны төвд дүүргийн нэрэмжит өдөрлөгийг зохион байгууллаа. Тус арга хэмжээний нээлтэд дүүргийн ИТХ-ын дарга П.Өлзийнаран, дүүргийн Засаг даргын орлогч Д.Мөнхбаатар, дүүргийн Жижиг дунд үйлдвэрлэл үйлчилгээг дэмжих төвийн дарга Ч.Чойдог болон бусад албаны хүмүүс оролцсон юм.  


Энэ жил зохион байгуулж “Амар байна уу” үзэсгэлэн худалдаанд 21 аймаг 9 дүүргээс 1000 гаруй жижиг дунд үйлдвэрлэл, үйлчилгээ эрхлэгчид оролцож 50 мянга орчим нэр төрлийн бараа бүтээгдэхүүн борлуулж байгаа бол Баянгол дүүргээс 75 жижиг дунд үйлдвэрлэл үйлчилгээ эрхлэгч оролцож өөрсдийн урлалсан бараа бүтээгдэхүүнээ худалдан борлуулж байна.

“Их наяд” худалдааны төвийн 5-6 давхар, “Соёолж молл” худалдааны төвийн хоёрдугаар давхарт 09:00-20:00 цагийн хооронд үргэлжилж байгаа бөгөөд түрээсгүй учраас бараа бүтээгдэхүүнээ зах зээлийн үнээс хямд борлуулж байгаа юм.