Баянгол дүүргийн СӨХ-дын уулзалт зөвлөгөөн боллоо

Баянгол дүүрэгт 300 орчим Сууц өмчлөгчдийн холбоо бүртгэлтэй байдаг бөгөөд дүүргийн ЗДТГ-аас өнөөдөр дээрх СӨХ-дын гүйцэтгэх захирлуудтай уулзалт зөвлөгөөн зохион байгууллаа.
Уулзалт зөвлөгөөнд дүүргийн Засаг дарга Ө.Сумъяабаатар, дүүргийн менежер Ж.Баатар, Тохижилт нийтийн аж ахуйн хэлтсийн дарга Г.Мөнх-Эрдэнэ, Дотоод аудитын дарга Н.Наранчимэг, Цагдаагийн газрын дарга Ч.Алтанхуяг, Онцгой байдлын хэлтсийн дарга Н.Оюунболд, МСӨХДЗ-ийн дарга М.Галбаатар нар оролцож цаг үеийн мэдээллүүдийг өглөө.
Тодруулбал, дүүргийн нийт оршин суугчдын 80 гаруй хувь нь орон сууцны хороололд амьдардаг бөгөөд дээрх 300 гаруй СӨХ нь 61600 орчим өрхийн өдөр тутмын ажил, амьдралын хэрэгцээ шаардлага амьдрах орчинтой холбоотой асуудлыг  нуруун дээрээ авч явдаг юм. Иймд,  

• Дүүргээс 2025 онд СӨХ-дын талаар авч хэрэгжүүлэх арга хэмжээ,
• СӨХ-дын санхүүгийн ил тод байдал болон тайлантай  холбоотой мэдээлэл,
• СӨХ-д Цагдаагийн байгууллагуудтай хамтран гэмт хэргээс урьдчилан сэргийлэх чиглэлд хэрхэн хамтарч ажиллах,
• СӨХ-д галын аюулгүй байдлаас урьдчилан сэргийлэх чиглэлээр авах арга хэмжээний талаар нэгдсэн мэдээлэл өглөө.

Түүнчлэн 2003 онд СӨХ-дын эрх зүйн байдлын тухай хууль батлагдсан. Гэвч өнөөдрийг хүртэл шинэчлэгдээгүйн улмаас дундын өмчлөлийн эд хөрөнгийн менежментийг тус  хуулиар цаашид авч явахад хүндрэлтэй болсон бөгөөд  УИХ-аар СӨХ-дын шинэчилсэн хуулийн төсөл хэлэлцэгдэж байгаа юм. Иймд СӨХДЗ-ийн зөвлөлийн дарга М.Галбаатар хуулийн төслийн талаар мэдээлэл өгсөн юм.