​14 МЕГА төслийн 50 хувь нь Говийн бүсэд хэрэгжинэ 

“Говийн бүсийн зөвлөл анхдугаар хуралдаан” Дорноговь аймагт өнөөдөр болж байна. Тус хуралдаанд Говьсүмбэр, Дорноговь, Дундговь, Өмнөговь аймгийн төлөөллүүд оролцож хэрэгжүүлэх төсөл хөтөлбөр, тулгамдаж байгаа асуудал зэргийг хэлэлцүүлж байгаа юм.

Тухалбайл Монгол улсын Засгийн газраас хэрэгжүүлэхээр зарласан 14 мега төслийн 50 орчим хувь нь Говийн бүсэд хэрэгжихээр байгааг Ерөнхий сайд Л.Оюун-Эрдэнэ болон Эдийн засгийн хөгжлийн сайд Л.Гантөмөр нар онцолж байлаа. 

Дурьдвал: Гашуунсухайт-Ганцмод, Ханги-Мандал, Шивээхүрэн-Сэхэ хилийн боомтын төмөр зам, Нүүрс-хими, кокс-химийн цогцолбор, Газрын тос боловсруулах цогцолбор, 450 МВт-ын хүчин чадалтай ДЦС зэрэг төсөл энэ бүсэд хэрэгжинэ. 

Мөн тус бүс нутагт тээвэр логистик, хот байгуулалт, боомт, соёл, аялал жуулчлал, боловсрол, эрүүл мэнд, эрчим хүч, үйлдвэр, үйлчилгээний зэрэг нийт 38 төсөл, бүтээн байгуулалтыг хэрэгжүүлэхээр төлөвлөж байгаа юм байна. 

Тухайлбал, Гашуунсухайт, Шивээхүрэн, Ханги боомтын зэрэглэлийг ахиулж, нэвтрүүлэх хүчин чадлыг сайжруулж, Өмнөговь аймагт нүүрс-эрчим хүч болон металлургийн кокс, бусад дагалдах үйлдвэр бүхий үйлдвэрлэл, технологийн парк байгуулж, тус аймгийн нисэх буудлыг 4D ангиллын болгон өргөтгөж, Замын-Үүдийн эдийн засгийн чөлөөт бүсэд барилгын материал, түүхий эдийн импортын хангамж, логистикийн төв байгуулна гэсэн мэдээллийг өгч байна.