Сонгуулийн санал авах өдөр чөлөө олгоогүй байгууллагыг ₮100 саяаар торгоно

УИХ-ын 2024 сонгууль зургаадугаар сарын 28-нд болно. Манай улсад нийт 2 сая 300 мянга гаруй сонгуулийн насны иргэд байгаа тухай статистик гараад байна. 

Тэгвэл Улсын Их Хурлын Сонгуулийн санал авах өдөр ажиллаж байгаа сонгогчид тухайн байгууллагын удирдлага чөлөө олгож, түүнийг санал өгөх боломжоор хангах үүрэгтэй талаар Сонгуулийн ерөнхий хорооноос уриалга гаргалаа. 

Хэрвээ байгууллага ажилчиддаа чөлөө олгоогүй тохиолдолд хууль зөрчсөн гэж үзэж,  Зөрчлийн тухай хуулийн 17.1.31-т заасны дагуу санал өгөх боломжоор хангаагүй иргэнийг 10 мянган нэгж буюу 10 сая, хуулийн этгээдийг 100 мянган нэгж буюу 100 сая төгрөгөөр торгох заалт бий. Тиймээс байгууллагууд ажилчдынхаа сонгох эрхийг хангаж, хуулийн хэрэгжилтийг хангаж ажиллахыг анхаарууллаа.