Ө.Золбаяр: 4 жилийн хугацаанд 84 сая ширхэг мод тарьж ургуулаад байна
2021-2024 он бол тус хөдөлгөөний бэлтгэл үе шат бөгөөд Улаанбаатар хот болон аймгууд 680 сая мод тарьж ургуулах амлалт авснаас Сэлэнгэ аймаг 17 сая орчим мод тарьснаараа тэргүүлж яваа аж. Уул уурхайн томоохон 22 аж ахуйн нэгж 9.2 сая мод тарьсны зэрэгцээ дүйцүүлэх хэлбэрээр 24 орчим сая, нийт 33 сая орчим мод тарьсан байна. Тарьж ургуулсан модныхоо тоогоор “Эрдэнэт үйлдвэр” ТӨҮГ бусдыгаа манлайлж буй. Үндэсний хөдөлгөөнийг эрчимжүүлэх, тарьц суулгацын нөөц бүрдүүлэх, бусад шаардлагатай хөрөнгө оруулалтыг дүйцүүлэн тооцох хэлбэрээр “Оюу Толгой”, “Эрдэнэс Тавантолгой” ХХК-тай хамтран ажиллаж байна. Монголын банкны холбооны гишүүн байгууллагууд “Тэрбум мод” санд жил бүр 2 тэрбум төгрөгөөс багагүй хэмжээний хандив өгөхөө батламжилсан. Мөн 88 сая мод тарих бөгөөд салбарын хэмжээнд ногоон зээлийг 2030 он гэхэд 10 хувьд хүргэж, 5.2 их наяд төгрөгийн зээл олгох юм байна.
2024 онд улсын төсвийн хөрөнгөөр:
- 4000 га талбайг ойжуулах, нөхөн сэргээх, гол нууруудын татмыг ойжуулах зорилгоор 3.1 сая мод тарих,
- 8 сая га талбайд ойн зохион байгуулалтын ажил хийж, ойн төлөв байдлыг үнэлэх
- Түймрийн 500 км халз болон шороон зурвас шинээр байгуулж, өмнө байгуулсныг сэргээх,
- 330 мянган га талбайд ойн хөнөөлт шавжтай тэмцэн, 1.2 тэрбум модыг доройтолд өртөхөөс сэргийлэх,
- 3 мянган га талбайд ойн арчилгаа, цэвэрлэгээ хийх,
- 130 га талбайд хамгаалалтын ойн зурвас байгуулах,
- Мод үржүүлгийн газруудад техник, тоног төхөөрөмжийн дэмжлэг үзүүлэх ажлууд хийгдэж байна.
