Японы ​"Никкей" УИХ-ын дарга Г.Занданшатарын илтгэлийг онцолжээ 

ЯПОН УЛСЫН “НИККЭЙ” ХЭВЛЭЛИЙН ГАЗРААС ЗОХИОН БАЙГУУЛЖ БУЙ “АЗИЙН ИРЭЭДҮЙ” 29 ДЭХ УДААГИЙН ЧУУЛГАНЫ ҮЕЭР МОНГОЛ УЛСЫН ИХ ХУРЛЫН ДАРГА Г.ЗАНДАНШАТАРЫН ИЛТГЭЛ ОНЦЛОХ ИЛТГЭЛҮҮДИЙН НЭГ БАЙЛАА. 

Тэрээр илтгэлдээ:  Монгол Улсын Их Хурал өнгөрсөн зургаан жилийн хугацаанд авлигыг таслан зогсоох, хууль дээдлэх ёсыг бэхжүүлэх, хяналт-тэнцлийн зарчмыг хангах, хууль тогтоох, шийдвэр гаргах үйл ажиллагаанд олон нийтийн оролцоог нэмэгдүүлэх чиглэлээр бодлогын болон эрх зүйн томоохон шинэчлэл хийх үндсийг тавьсан төдийгүй Монгол Улсад төлөөллийн болон шууд ардчиллыг хамгаалах, бэхжүүлэх нь манай парламентын тэргүүлэх чиглэл юм. Үүнийг хэрэгжүүлэхийн тулд бид 3D-Парламент буюу Ардчилсан (Democratic), Цахим (Digital), Зөвлөлдөх (Deliberative) парламентын тогтолцоог бий болгосон талаар илтгэлдээ онцоллоо. Улмаар  2017 онд батлагдсан Зөвлөлдөх санал асуулгын тухай хуульд нийцүүлэн өнгөрсөн 7 жилийн хугацаанд зөвлөлдөх санал асуулгыг улсын хэмжээнд хоёр удаа зохион байгууллаа. Зөвлөлдөх санал асуулгын дүнд Монгол Улсын Үндсэн хуульд чухал нэмэлт, өөрчлөлт оруулах замыг тавьж өгсөн. Энэхүү нэмэлт, өөрчлөлтөөр парламентын ардчиллыг бэхжүүлж, парламент дахь төлөөллийг нэмэгдүүлж, улс төрийн шийдвэр гаргах түвшинд хүйсийн тэгш байдлыг хангасанныг дурьдлаа. 

УИХ-ын даргын илтгэлд олны анхаарлыг татсан өөр нэг сэдэв нь геополитикийн хувьд дэлхий нийтээр хурцадмал байдал үүсч, их гүрнүүдийн байр суурийн зөрүү урт хугацааны сорилтууд дагуулж байгааг сөрж, Монгол Улс үндэсний аюулгүй байдлаа сахин хамгаалж, хөгжлөө дэмжихээр “энх тайвныг эрхэмлэсэн, нээлттэй, олон тулгуурт, тэнцвэртэй” гадаад бодлогыг тууштай баримталж байна. Орос, Хятадтай тэнцвэртэй харилцахын зэрэгцээ бусад оронтой нягт хамтран ажиллах нь Монгол Улсын хувьд заримдаа сорилт болдог хэдий ч, шинэ зүйл биш юм. “Гуравдагч хөрш”-ийн бодлого нь Монгол Улсын үндэсний аюулгүй байдал, язгуур эрх ашигтай холбоотой асуудалд хоёр хөршийнхөө нөлөөг ашигтайгаар ашиглах боломжийг олгож, дипломат шугамаар зохицуулах эрх чөлөөг олгодог.

“Гуравдагч хөрш”-ийн бодлого бол зөвхөн улс төрийн бодлого биш, эдийн засаг, гадаад худалдаа, хөрөнгө оруулалтаа төрөлжүүлэх боломжийг олгодог бодлого юм. Манай улсын “гуравдагч хөрш”-үүд худалдаа, эрчим хүч, хүнсний хараат байдлыг тэнцвэржүүлэхэд чухал үүрэг гүйцэтгэдэг. Иймд Монгол Улс хоёр хөрштэйгөө агаарын, авто зам, төмөр замын сүлжээгээ хөгжүүлж, ингэснээрээ гуравдагч хөршүүдтэйгээ холбогдох боломжийг нэмэгдүүлэх сонирхолтой байгаагаа илэрхийллээ. 

Мөн Монгол улс 2030 он гэхэд хүлэмжийн хийн ялгаруулалтыг 22,7 хувиар бууруулах зорилт тавин ажиллаж, чулуужсан түлшнээс сэргээгдэх эрчим хүчний эх үүсвэрт шилжихэд шударга, хүртээмжтэй байдлаар хичээн ажиллаж байна. Монгол Улс ашигт малтмалаар баялаг төдийгүй сэргээгдэх эрчим хүчний нөөцөөр баялаг. Бүс нутгийн улс орнуудад тус улсын санал болгож буй сэргээгдэх эрчим хүчний арвин нөөцийг ашиглах маш сайн боломж бий талаар илтгэлдээ дурьдлаа. 

Түүний илтгэлд хүний эрх, жэндер, уул уурхай, эдийн засаг гэх салбар бүрийн мэдээлэл орсноос гадна Монголын Финтек стартапууд Японы худалдааны компаниудын анхаарлыг татаж, хөрөнгө оруулалтаа хийж эхэлснийг цохон тэмдэглэж Япон төдийгүй Сингапур болон Азийн бусад орны залуу бизнес эрхлэгчид Монголын технологийн салбарыг анхааралтай ажиглаж байгаа талаарх мэдээллийг өглөө. 

 Токио хот