Дэлхийг чиглэн “ХАРИЙН ХӨЛӨГ” ирсэн гэв үү?

3I/Atlas нэр авсан сүүлт од дэлхийг чиглэж яваа нь эрдэмтэд болон олон нийтийн дунд олон таамаг дэвшүүлэн анхаарал татах болжээ. Учир нь эрдэмтэд сансрын биетийг “сүүлт од” гэж үзэж байгаа бол зарим нь үүнийг “харь гаригийнханы хөлөг”, мөн “ертөнцийн төгсгөл ойртож байна” гэхчлэн ярьж бичиж байна.

Тэгвэл ийнхүү олон нийтийг хуваан талцуулж байгаа гариг эрхсийн объект нь дэлхийд үзэгдэж, тэнгэрт харагдсан нарны аймгаас гадуурх 3 дахь сансрын объект болжээ. Тиймээс “3I” гэх нэр өгчээ.

Хүн төрөлхтөнд танигдсан өмнөх сүүлт одуудтай харьцуулбал 3I/Atlas нь хурд болон туулсан замын хувьд Нарны аймгийн системээс гадуурх, алс холын биет гэж тооцоход хүргэжээ. Шинэ сүүлт од Нарны аймгийн цаадах гариг эрхсээс ирсэн, дэлхийг чиглэн ойрхон зөрж ирэх оны эхээр цааш одох гэнэ.

3I/Atlas сүүлт одыг анх 2025 оны 7-р сарын эхээр олж мэджээ. Энэхүү биетийг НАСА-ийн санхүүжилттэй Чилид байрлах Atla дуран авайн тусламжтай илрүүлсэн байна. Эрдэмтэн судлаачдын үзэж байгаагаар 3I/Atlas нь алс холын оддын системд үүсч, гариг эрхсээр хэдэн тэрбум жил аялж байгаа, магадгүй хамгийн эртний сүүлт од ч байж болох гэнэ. 

Судлаачид 3I/Atlas сүүлт одыг магадгүй 7 тэрбум жилийн настай гэж үзэж байна. Хэрвээ энэ таамаглал үнэн бол 4,6 тэрбум жилийн настай Нарны аймгийн системээс ч өндөр настай сүүлт од болох нь ээ. 3I/Atlas сүүлт од нь Нумын ордны зүгээс Сүүн замаар дамжин Нарны аймгийн системд орж ирсэн байж болох гэнэ. 

Орчуулсан Б.Оюун