АНУ-Д ХАМГИЙН УДААН ҮРГЭЛЖИЛСЭН “ШАТДАУН”-ЫГ ЗОГСООХООР ТОХИРОЛЦЛОО

АНУ-ын түүхэнд хамгийн удаан буюу нийт 40 хоног үргэлжилсэн “шатдаун”-ыг зогсоохоор тохиролцлоо. Америкийн хоёр намын төлөөлөл бүхий сенатын танхимын гишүүд олонхийн саналаар улс орны төсвийн тухай хуулийн маргаанаа эцэслэж, төрийн үйл ажиллагааг цаашид хэвийн явуулахаар тогтлоо.

Конгресс төрийн албаны санхүүжилтийн асуудлаар тохиролцоонд хүрч чадаагүйгээр “шатдаун” зарлахад хүрч, улмаар Америкийн Засгийн газрын үйл ажиллагаа бүтэн сар гаруйн хугацаанд зогсонги байдалд ороод байсан юм. Үүнээс өмнө 2019 онд Дональд Трампыг төрийн эрхэнд гарсан эхний бүрэн эрхийн хугацаанд төрийн ажил 35 хоногоор “гацаж” байжээ.

Тэгвэл энэ удаад “шатдаун” 40 хоног үргэлжилж, сенатын танхимын гишүүд төрийн албаны санхүүжилтийн асуудлаар тохиролцоонд хүрч чадсанаар Америкийн төр, захиргааны ажил хэвийн үргэлжлэх боломжтой болжээ.  

Төсвийн хуулиа баталж чадаагүйгээс төрийн байгууллагуудын санхүүжилт зогсох болсон шалтгаан нь Mediaid хөтөлбөрийн хэрэгжилтийг зогсоох, мөн эрүүл мэндийн даатгалын хөнгөлөлтийг сунгах зэрэг асуудлаар хууль боловсруулагчид санал зөрөлдсөн нь нөлөөлжээ.