МОНГОЛЫН ПАРАЛИМПЫН БААТРУУДЫН ШИНЭЭР БИЧСЭН ТҮҮХ

Францын нийслэл Парис хотноо зохиогдсон зуны спортын XVII Паралимп өндөрлөлөө. Тус наадамд дэлхийн 180 орны тамирчид 12 хоногийн турш 549 багц медалийн төлөө хүч чадал, хичээл зүтгэлээ дайчлан өрсөлдөв. Монгол улс энэ наадамд 12 тамирчин оролцож 4 медаль хүртсэн амжилтаар 57 дугаар байрт жагслаа. 

Монголын баг тамирчид энэ удаагийн Паралимпд дараах түүхийг бичжээ. 

1. Монгол улсад анхны ЭМЭГТЭЙ олимпын аварга төрлөө. Тэр бол таэквондогийн тамирчин У.Сүрэнжав юм.

2. Хөнгөн атлетикийн төрөлд ОУХМ Ц.Баттулга мөнгөн медаль хүртэж, энэ төрлөөр анхны олимпын медалтай боллоо. 

3. Анхны олимпын гурван медальтантай боллоо. Пауэрлифтингийн спортын тамирчин Э.Содномдэлжээ гурав дахь удаагаа олимпын наадмын медаль хүртсэн Монгол улсын анхны тамирчин боллоо. 

4. Паралимпын нэг наадмаас 12 тамирчны 4 нь буюу 30 гаруй хувь нь 4 медаль хүртсэн анхны амжилт байлаа. 

Ийнхүү Монгол улсын паралимпын баг тамирчид түүхэн амжилт үзүүлж, иргэд олон нийт, спорт сонирхогчдын магнайг тэнийлгэсэн амжилтаар энэ удаагийн наадмаа өндөрлүүлж байна. Нийт баг тамирчиддаа уншигчдынхаа өмнөөс эрүүл энхийг хүсэн ерөөе. 

"Паралимп" гэдэг нь Грекийн "пара" буюу хажууд, дэргэд гэсэн угтвар болон "Олимп" гэсэн үгний нийлбэр юм. Үүний цаад санаа нь Паралимп бол Олимптой зэрэгцэн оршдог наадам бөгөөд хоёр хөдөлгөөн нэг хэмд буйг илтгэж байгаа бөгөөд хүн төрөлхтний эв нэгдлийн наадам гэдгээрээ илүү онцлогтой юм. 

Паралимп нь 1960 онд Италийн Ром хотод зохиогдох үеэс эхлэн Паралимпын наадам гэх нэршилтэйгээр өнөөдрийг хүртэл зуны олимпын наадамтай зэрэгцэн зохион байгуулагдаж байна.