ТӨВ: АЙМГИЙН НЭГДСЭН ЭМНЭЛЭГ 2026-2027 ОНЫ ХИЧЭЭЛИЙН ЖИЛИЙН НЭЭЛТЭЭ ХИЙЛЭЭ
Аймгийн Нэгдсэн эмнэлэг ЭМС-ын А/337 тоот тушаал, Эрүүл мэндийн сайд, Төв аймгийн Засаг даргын 2026 онд хамтран ажиллах гэрээний дагуу Эрүүл мэндийн хөгжлийн зөвлөлийн 2026 оны 7 дугаар сарын 28-ны өдрийн тогтоолоор “Ерөнхий мэргэшил судлал”-ын чиглэлээр сургалт эрхлэх зөвшөөрөл авчээ.
Энэ дагуу өнөөдөр 2026-2027 оны хичээлийн жилийн нээлтээ хийж анхны сургалтаа хийлээ. Сургалтад аймгийн Засаг дарга Л.Төмөрчөдөр, Засаг даргын зөвлөх Б.Отгонбаяр, ЭМГ-ын дарга Ч.Алтантуул нар оролцож Нэгдсэн эмнэлгийн хамт олон, сургуулиа төгсөөд 4 сар болж байгаа 13 эмчид амжилт хүсч, хамтран ажиллахаа илэрхийллээ.
Сургалтын зорилго нь хүн амыг өвчнөөс урьдчилан сэргийлэх, эрүүл мэндийн тусламж үйлчилгээг үзүүлэх үүрэг хариуцлагаа бүрэн ойлгосон, зонхилон тохиолдох өвчний оношилгоо, эмчилгээ хийхэд шаардагдах мэдлэг, ур чадварыг эзэмшсэн, өвчтөнд энэрэх сэтгэлээр хандаж, эмчийн ёс зүйг чандлан баримталдаг, үйлчилгээг үр дүнтэй үзүүлж чаддаг эмч болоход орших юм.
Сургалтад мэргэжлийн Ахлах, Тэргүүлэх зэрэгтэй, анагаах ухааны болон боловсролын ухааны магистр, докторант, клиникийн профессор цолтой эмнэл зүйн 30 сургагч багш нарыг дагалдан дотрын анагаах судлал, хүүхэд судлал, эх барих, эмэгтэйчүүд судлал, яаралтай тусламж судлал гэсэн 4 чиглэлээр тойролт хийж, эмнэлгийн анхан шатны тусламж, үйлчилгээний сургалт болон сонгон суралцах чиглэлээр 1 жилийн хугацаанд хамрагдана.
