Намын дарга нарын АТГ-д мэдүүлсэн хөрөнгө орлогыг Н.Номтойбаяр тэргүүлж байна

МАН-ын дарга Л.ОЮУН-ЭРДЭНЭ: Өөрийн орлого 243 сая 930 мянган төгрөг, гэр бүлийн орлого 15 сая 750 мянган төгрөг, нийт 364 сая төгрөгийн  үнэ бүхий нэг орон сууцтай. Тээврийн хэрэгслийн тухайд нийт 30 сая төгрөгийн үнэ бүхий жийп болон туулах чадвар өндөр Toyota, Highlande маркийн автомашинтай. Мөн 169 саяар үнэлэгдэх хурдан удмын таван адуу, 18 адуу, 76 үхэр, 90 хонь, 113 ямаатай.

67 сая 500 мянган төгрөгийн үнэт эдлэл 133 сая төгрөгийн хадгаламжтай.

"Херо энтертайнмент групп" ХХК, Хүлэг контент ХХК-д 50-100 хувь эзэмшдэг гэж мэдүүлжээ.

АН-ын дарга Л.ГАНТӨМӨР: Өөрийн орлого 31 сая төгрөг, гэр бүлийн орлого хоёр сая төгрөг, нийт 705 сая төгрөгийн үнэ бүхий нийтийн дөрөв, амины нэг орон сууцтай. Тээврийн хэрэгслийн тухайд нийт 319 сая төгрөгийн үнэ бүхий жийп болон туулах чадвар өндөр Nissan, Patrol-1 маркийн автомашинтай. Мөн 175 саяар үнэлэгдэх 160 адуу, 10 үхэртэй.

25 сая төгрөгийн хадгаламж, 54 сая 737 мянган төгрөгийн зээлтэй.

"Астрарүүт" ХХК-д 17.15 хувь, "Эрдэнэс таван толгой" ХК-д 1072 ширхэг хувьцаа эзэмшдэг гэж мэдүүлжээ.

ХҮН намын дарга Т.ДОРЖХАНД: Өөрийн орлого 62 сая 328 мянган төгрөг, гэр бүлийн орлого 157 сая 256 мянган төгрөг, нийт нэг тэрбум төгрөгийн  үнэ бүхий нэг орон сууц, нэг зуслангийн байшинтай. 25 сая төгрөгийн суудлын жижиг Nissan, Nissan-1 маркийн автомашинтай. 10 сая төгрөгийн 12 адуутай. 50 сая төгрөгийн 0.7 га газар, 2 сая 385 мянган төгрөгийн дотоод хадгаламжтай. Мөн 1.1 тэрбум төгрөгийн авлагатай.

"Монре Даатгал" ХХК, "Монреимпекс" ХХК, "Зээл Эм Эн" ХХК, "Айтүүлс" ХК, "Авто Хаб" ХХК, "Стандарт Инвестмэнт" ҮЦК, "Монре файнаншиал" ХХК, "Эрдэнэс таван толгой" ХК-д 0.01-100 хувийн хувьцаа эзэмшдэг гэж мэдүүлжээ.

Үндэсний эвслийн тэргүүн Н.НОМТОЙБАЯР: Өөрийн орлого хоёр тэрбум төгрөг, нийт 1 тэрбум 309 сая төгрөгийн үнэ бүхий нэг орон сууц, үйлчилгээний зориулалттай нэг талбай, дуусаагүй байгаа нэг барилгатай. 3 тэрбум 443 сая төгрөгийн үнэ бүхий автомашинтай.

104 сая төгрөгийн дотоодын хадгаламжтай. "Трү Ти Ар Си" ХХК, "Монголын Алт" ХХК, "Монголын Алтан Аялал" ХХК, "Цэлмэг Тэнгэрийн Нислэг" ХХК, "Хүннү Эйр" ХХК-д тус тус хувь эзэмшдэг.

ИЗНН-ын дарга Б.БАТБААТАР: Өөрийн орлого 20 сая төгрөг, орон сууцгүй, тээврийн хэрэгсэлгүй. 243 сая төгрөгийн бэлэн мөнгөтэй гэж мэдүүлжээ.