Төв аймгийн Жаргалант сумын засаг дарга асан Д.Ганболд өөрийн ах дүү, хамаатан саднаараа дамжуулан Хятад иргэдэд газар зардаг уу?
Тодруулбал: Төв аймгийн Жаргалант сумын засаг даргаар ажиллаж байсан Д.Ганболд гэгч нь өөрийн ах дүү төрөл төрөгсдөөрөө дамжуулан газар эзэмшүүлж, цааш нь Өвөрмонгол, Хятад компаниудад дамлан зарж байна гэж нутгийн иргэд хардаж байна. Үүний нэг жишээ нь Жаргалантын усан сан нуурын эрэгийг хашаалсан асуудал бөгөөд1960-аад оны эхэн үеэр Төв аймгийн Жаргалант суманд байгуулсан усан сан нуур хур ихтэй жил хэмжээ нь томорч, хиймэл далангаа давах хэмжээний устай болдог, ногоо, тариан талбай услахаас гадна, сумын иргэд зусаж, хүн мал ундаалдаг нуур юм.
Гэтэл 2012-2016 онд тус сумын засаг даргаар ажиллаж байсан Д.Ганболд нуурын зүүн эрэгт өөрийн хамаатан болох Д.Тамирын Аригунто ХХК-д Амралт сургалтын төвийн зориулалтаар 10 га газрыг олгожээ. Гэтэл 4.5 га газрыг хашаалж барилга байгууламж барьсан бөгөөд нийт 10 га талбайг хашаалж, амралтын газар байгуулах барилгын ажил эхлээд байгааг нутгийн иргэд эсэргүүцэж байна. Хамгийн гол нь Аригунто компаний төлөөлөх эрх бүхий хүн нь БНХАУ-ын иргэн Ван Чин Шан гэгч байх бөгөөд Өвөрмонгол хүмүүс хариуцаж, сургалтын төв ч буй, ахмадын сувилдал ч бус, амралтын бааз барихаар ажлаа эхлүүлсэн ч иргэд шаардлага тавьж, одоогоор барилгын ажил түр зогсоод байна.
Жаргалант сумын засаг дарга асан Д.Ганболд өөрийгөө хууль зөрчөөгүй хэмээн тайлбар өгдөг бол, харин түүний хамаатан Д.Тамир гэгч нь тус газрыг дуудлага худалдаагаар авсан хэмээн нутгийн иргэдийн амыг тагладаг ажээ. Тэд нийлж нэг биш газрыг Жаргалант сумаас авч, цааш дамлан наймаалж байж болзошгүй гэж сумын иргэд хэлж байна. Ах дүүсийн ашиг сонирхолоос гадна, нуурын ай савд газар олгосон Газрын тухай хуулийг зөрчиж байгаа учраас цаашлаад АТГ-д хандаж шалгуулна гэлээ.
